अंत में एतने कहबी की भोजपुरी भाखी छेत्रन के केतने नेता, अभिनेता, दबंग लोग बा, जे खाली तनी-मनी भी मन से चाही देव त भोजपुरी अपनी सिहांसन पर सदा खातिर बिराजमान हो जाई। आज भाजप के सासन बा, केतने भोजपुरिया बाने जवन भाजप से जुड़ल बाने अउर भाजप भी चुनाव की पहिले भोजपुरी के दरजा दिआवे खातिर गंभीर रहे...फेर का भइल....पतर-सतर लिखले से कुछ ना होई अउर ना खाली सभा-समाज में इ कही देहले से की हम माईभाखा की प्रति गंभीर बानीं...कुछ करे के परी....अउर हम जाहबी की केहू भोजपुरिया अगुवाई क के इ जगी जीत लेव, जगि सफल क देव....अउर सायद इ केहू भोजपुरिया सांसद, भाजप नेता आदी के बीड़ा उठावे के चाहीं अउर हर असतर पर परयास क के माईभाखा के सुसोभित करा देबे के चाहीं.....भोजपुरिया भले खुसुर-फुसुर करो पर पर ए मुद्दा पर हम जानतानाी की सब भोजपुरिया के साथ मिली अउर अगुआ भी माईभाखा की साथे सोभित हो जइहें, भोजपुरियन की दिल में, दिमाग में, घर में, परिवार में। जय माईभाखा।
जवनेगाँ कहल गइल बा की साँस ही भगवान ह...फिर भी लोग के मंदिर में जा के ही चैन मिलेला, ओहींगा भोजपुरी सांस में होखला पर भी, आधिकारिक भाखावन के बनल मंदिरन में एगो अउर मंदिर बनवावल जरूरी बा..माईभाखा भोजपुरी के मंदिर।
ए दिसाईं हमरा माननीय मनोज तिवारीजी से बहुते-बहुत उम्मेद बा। जय माई-भाखा।
-प्रभाकर पांडेय